मिति २०८३ आषाढ २६ गते, शुक्रबार, महिला उद्यमीहरुमा वित्तीय साक्षरता अभिवृद्धि एवं डिजिटल वित्तीय सेवाप्रति पहुँच विस्तार तथा आर्थिक सशक्तीकरण प्रवद्र्धन गर्ने उद्देश्यले मोरङ उद्योग व्यापार संघको महिला उद्यम समिति र ईसेवा लिमिटेडले विराटनगरमा महिला उद्यमीहरुका लागि ‘वित्तीय साक्षरता तालिम’ सम्पन्न गरेको छ ।

मोरङ उद्योग व्यापार संघको महिला उद्यम समितिकी संयोजक श्रुति शर्मा र ईसेवा लिमिटेडका सीईओ ट्रान्सफर्मेसन कार्यालयका प्रमुख सुमन खरेलको सभापतित्वमा आयोजित उक्त तालिम कार्यक्रमको उद्घाटन सत्रमा प्रमुख अतिथिको रुपमा नेपालस्थित स्विस दूतावासका प्रथम सचिव शिशिल रिभियरको उपस्थिति रहेको थियो । साथै, कार्यक्रममा विशिष्ठ अतिथिका रुपमा मोरङ उद्योग व्यापार संघका वरिष्ठ उपाध्यक्ष अनिल कुमार साह र अतिथिको रुपमा स्विस दूतावासका इनोभेसन तथा डिजिटलाइजेसन कार्यक्रम अधिकृत स्नेहा भट्टराईको उपस्थिति रहेको थियो ।

कार्यक्रममा स्वागत मन्तव्य दिने क्रममा कार्यक्रमका सभापति एवं ईसेवाका सीईओ ट्रान्सफर्मेसन कार्यालयका प्रमुख सुमन खरेलले वित्तीय समावेशीकरणलाई सुदृढ बनाउन निजी क्षेत्र र सरोकारवाला निकायबीचको सहकार्य आवश्यक रहेको उल्लेख गर्दै वित्तीय साक्षरतामार्फत उद्यमशीलताको विकास र आर्थिक सशक्तीकरणमा सकारात्मक योगदान पुग्ने विश्वास व्यक्त गर्नु भएको थियो । साथै वहाँले डिजिटल युगमा महिला उद्यमीहरुका लागि वित्तीय ज्ञान र डिजिटल वित्तीय सेवाको प्रभावकारी उपयोग अपरिहार्य बन्दै गएको उल्लेख गर्नु भई ईसेवामार्फत उपलब्ध डिजिटल सेवाहरुले व्यवसाय सञ्चालनलाई थप सहज, सुरक्षित तथा प्रभावकारी बनाउन महत्वपूर्ण भूमिका खेल्ने जानकारी गराउनु भएको थियो ।

त्यस्तै, कार्यक्रमका विशिष्ठ अतिथि अनिल कुमार साहले वित्तीय साक्षरता जस्ता महत्वपूर्ण कार्यक्रम संचालनका लागि मोरङ उद्योग व्यापार संघको महिला उद्यम समितिसँग सहकार्य गरेकोमा ईसेवा लिमिटेडप्रति आभार प्रकट गर्दै डिजिटल अर्थतन्त्रको विस्तारसँगै उद्यमीहरुका लागि डिजिटल वित्तीय साक्षरता अत्यावश्यक बन्दै गएको उल्लेख गर्नु भएको थियो । सोही क्रममा उहाँले सो तालिमबाट प्राप्त ज्ञानलाई व्यवहारमा प्रयोग गरी व्यवसायलाई थप प्रतिस्पर्धी र प्रविधिमैत्री बनाउन सकिने अपेक्षा लिएको बताउनु भएको थियो । साथै, ईसेवालाई आफ्ना सेवाहरुलाई अझ सहज, सुरक्षित र विश्वसनीय बनाउन आग्रह गर्नु भई उहाँले डिजिटल वित्तीय सेवाको विस्तारले उद्यमशीलताको विकासमा सकारात्मक योगदान पु¥याउने धारणा समेत राख्नु भएको थियो ।

कार्यक्रममा ईसेवा लिमिटेडका प्रदेश इन्चार्ज झलक सुब्बाले वित्तीय साक्षरताको महत्व, डिजिटल वित्तीय सेवाको सुरक्षित तथा प्रभावकारी प्रयोग, बचत तथा लगानी संस्कृतिको विकास लगायतका विषयमा प्रकाश पार्नु भएको थियो भने ईसेवा लिमिटेडका सोसल इम्प्याक्ट म्यानेजर उदित चन्द्र अर्यालले सो तालिममा सहजीकरण गर्नु भएको थियो ।

विशेषगरी महिला उद्यमीहरुलाई वित्तीय व्यवस्थापन, डिजिटल भुक्तानी प्रणाली तथा सुरक्षित डिजिटल कारोबार सम्बन्धी व्यवहारिक ज्ञान दिने उद्देश्यले संचालित उक्त तालिममा सहभागीहरुलाई बैंक तथा वित्तीय संस्थाका सेवा, विभिन्न वित्तीय उत्पादन, डिजिटल वालेट तथा रेमिट्यान्स सेवा, सामाजिक सुरक्षा कोष, बीमा सेवा, डिजिटल कारोबारमा हुन सक्ने ठगी तथा साइबर जोखिमबाट बच्ने उपाय, साना तथा मझौला उद्यमका लागि सम्भावित लगानीका क्षेत्रहरु लगायतका विषयहरुमा व्यवहारिक तथा उपयोगी जानकारीहरु प्रदान गरिएको थियो । सो तालिमले महिला उद्यमीहरुको वित्तीय ज्ञान, निर्णय क्षमता तथा डिजिटल वित्तीय सेवामा पहुँच अभिवृद्धि गर्न मद्दत पु¥याउनुका साथै महिला सशक्तीकरण, वित्तीय समावेशिता र समग्र आर्थिक गतिविधिमा उनीहरुको सक्रीय सहभागिता विस्तार गर्न महत्वपूर्ण योगदान पु¥याउने विश्वास लिइएको छ ।

तालिम समापनका क्रममा धन्यवाद मन्तव्य दिँदै कार्यक्रमकी सभापति तथा मोरङ उद्योग व्यापार संघको महिला उद्यम समितिकी संयोजक श्रुति शर्माले समेत सो तालिमले महिला उद्यमीहरुको वित्तीय क्षमता विकास, डिजिटल वित्तीय सेवाको प्रभावकारी उपयोग तथा उद्यमशीलताको दिगो विकासमा महत्वपूर्ण भूमिका निर्वाह गर्ने विश्वास व्यक्त गर्नु भई उपस्थित सबैलाई सक्रीय सहभागिताका लागि धन्यवाद ज्ञापन गर्नु भएको थियो । साथै उहाँले महिला उद्यमीहरुको क्षमता अभिवृद्धिका लागि मोरङ उद्योग व्यापार संघको महिला उद्यम समितिबाट विगत देखिनै हर–सम्भव प्रयास गरिँदै आएको र आगामी दिनहरुमा समेत त्यस प्रकारका कार्यक्रमहरुलाई निरन्तरता दिइने प्रतिवद्धता जाहेर गर्नु भएको थियो ।

विराटनगरको रत्न होटेलमा संचालित उक्त तालिममा विराटनगर महानगरपालिका सहित बुढीगंगा, ग्रामथान र कटहरी गाउँपालिकाका विभिन्न संघ–संस्था र समितिहरुमा प्रत्यक्ष/अप्रत्यक्ष रुपमा आवद्ध महिला उद्यमीहरुको भव्य सहभागिता रहेको थियो ।