नेपाल र भारतबीचको आर्थिक तथा व्यवसायिक सम्बन्धलाई थप प्रगाढ बनाउने उद्देश्यले भारतको सिलीगुडीमा आयोजित दुई दिने ‘सिलीगुडी डायलग २०२६’मा मोरङ उद्योग व्यापार संघले सक्रीय सहभागिता जनाएको छ । कनफेडरेसन अफ इन्डियन इन्डस्ट्रिज (सीआईआई) र एसियन इन्स्टिच्युट अफ डिप्लोमेसी एन्ड इन्टरनेसनल अफेयर्स (एआईडीआईए)ले संयुक्त रुपमा २०८३ जेठ ३० र ३१ गते सिलीगुडीमा आयोजना गरेको ‘साझा समृद्धिका लागि नेपाल–भारत आर्थिक साझेदारी सुदृढीकरण’ (Strengthening Nepal–India Economic Partnership for Shared Prosperity) विषयक सो संवाद कार्यक्रममा यस संघका वरिष्ठ उपाध्यक्ष अनिल कुमार साहको नेतृत्वमा का.का. सदस्य विनीत सिंघानिया सहित विराटनगरका उद्योगीहरु ऋषभ सोमानी र केतन साहले सहभागिता जनाउनु भएको छ ।

दुई देशका नीति–निर्माता, लगानीकर्ता, उद्योगी र विज्ञहरुको सहभागितामा नेपाल र भारतबीच द्विपक्षीय हित र आर्थिक समृद्धिका लागि महत्वपूर्ण मानिएका विषयहरुमा गहन छलफल गर्ने उद्देश्यले आयोजित सो संवाद कार्यक्रमको समुद्घाटन सत्रमा विशेषगरी पर्यटन तथा नवीकरणीय ऊर्जा, ग्रामीण तथा सम्पदा संरक्षण पर्यटन, स्वास्थ्य सेवा समन्वय, शिक्षा र उद्यमशीलता, शैक्षिक साझेदारी आदि विषयहरुमा छलफल गरिएको थियो ।

कार्यक्रममा सुझाव प्रस्तुति, अनुभव आदान प्रदान तथा छलफलका क्रममा वरिष्ठ उपाध्यक्ष अनिल कुमार साहले आर्थिक, धार्मिक तथा सांस्कृतिक क्षेत्रमा दुई देशबीचको ऐतिहासिक सम्बन्धहरु बारे चर्चा गर्नु भई पर्यटन, नवीकरणीय ऊर्जा र स्वास्थ्य जस्ता क्षेत्रमा सहकार्यका प्रचुर सम्भावनाहरु रहेको औंल्याउँदै तिनको व्यवहारिक कार्यान्वयनका लागि सुझावहरु प्रस्तुत गर्नु भएको थियो । त्यस्तै, संघको तर्फबाट महत्वपूर्ण अनुभव एवं व्यावहारिक दृष्टिकोणहरु प्रस्तुत गर्दै उहाँले नेपालमा लगानीको वातावरण सुध्रिँदै गएको अवस्थामा भारतीय लगानीकर्ताहरुका लागि औद्योगिक, शैक्षिक र पूर्वाधारका क्षेत्रहरु निकै आकर्षक गन्तव्य बन्न सक्ने धारणा राख्नु भई सीमापार व्यापार सहजीकरण, नीतिगत निरन्तरता र निजी क्षेत्रबीचको नियमित संवादले मात्रै व्यापारिक क्षेत्रमा देखिएका व्यावहारिक अड्चनहरु फुकाउन सक्नेमा जोड दिनु भएको थियो । साथै उहाँले भौगोलिक रुपमा नेपाल, भुटान र बंगलादेशको त्रिदेशीय र संवेदनशील बिन्दुमा अवस्थित सिलीगुडी कोरिडोरलाई आर्थिक अवसर, आपसी विश्वास र दीर्घकालीन सहयोगको बलियो सेतु बनाउन सिलीगुडी डायलग २०२६ ले महत्वपूर्ण भूमिका खेल्ने विश्वास व्यक्त गर्नु भएको थियो ।

सो समुद्घाटन सत्रमा एआईडीआईएका संस्थापक तथा नेपाल–भारत उद्योग वाणिज्य संघका अध्यक्ष सुनील के.सी.ले उद्घाटन मन्तव्य दिनु भएको थियो भने सीआईआई उत्तर बंगाल जोनल काउन्सिलका अध्यक्ष सतिश मित्रुकाले सिआईआईको दृष्टिकोण बारे आफ्नो मन्तव्य दिनु भएको थियो । त्यस्तै कार्यक्रममा विषयगत प्रमुख वक्ताहरुका रुपमा काउन्सिलका उपाध्यक्ष अमल मण्डल, नेपाल–भारत उद्योग वाणिज्य संघका उपाध्यक्ष कुणाल कायल, ग्रामीण सम्पदा संरक्षण पर्यटनका विशेषज्ञ सुप्रतिम (राज) बसु, किन्स हस्पिटलका संस्थापक सुमित सिंघल, आईईसी ग्रुप नेपालकी प्रबन्ध निर्देशक श्रीमती शैलजा अधिकारी, आईआईएएस स्कुल अफ म्यानेजमेन्टका प्रिन्सिपल डा. के.भी. राजेन्द्रन नायर र ग्लोकल प्राइभेट लिमिटेडका अध्यक्ष आशिष ठाकुर रहनु भएको थियो भने नेपालको प्रतिनिधि सभाका माननीय सांसद परश मणी गेलालले समापन मन्तव्य दिनु भएको थियो ।